​Oos nuuj prinsepaar is bekindj! De scepter van D’n Uul van den Grauwert is ’t kómmendj vastelaovessezoen in henj van Kristian van Pol. Prins Kristian I geit, same mit zien vrouw Nathalie es Prinses, veurop op waeg nao de vastelaovendj van 2026. Prins Kristian I en Prinses Nathalie waerdje aafgeloupe zaoterdig 15 november oetgerope op ’n drök bezóch Prinsebal bie de Vogel. Same mit de raod van èllef, bevrundje vastelaovesvereniginge en väöl anger (Moferter) belangstèllendje maakdje ze d’r ein geweldig fieës van!

 

Prins Kristian I (45) is getaoge en opgegreudj in Mofert, es 2e zoon van oze aad-veurzitter en ieërelid Lambert van Pol. Hae greudje op en sleet zien jeug inne Baenj, in ’t boetgebied van oos sjoean dörpke. Prinses Nathalie (41) is ein Posters maedje, gebaore en getaoge op Vurehaof achter de kirk. Vanaaf 2008 wone zie same oppe Staasjeswaeg in Mofert. Inne dao op volgenje jaore trouwdje ze en waerdje ’t gezin oetgebrèdj mit zoon Tygo (14) en dochter Sue (11).

 

Kristian en Nathalie zeen allebei echte vastelaovesvierders. Kristian is al van kleins aaf aan deilnummer ane Moferter vastelaovesoptoch. Mit de “men ónger ós” waerdje de prachtigste creasies geboewdj en de eine nao de angere pries binnegesleip, wo onger inkele kieëre de ieërepries. En netuurlijk waerdje det ouch naovenandj gevierdj, alle vastelaovesdaag en toet inne klein uurkes. Ouch Nathalie viertj vastelaovendj van kleins aaf aan, het lieërdje de klappe vanne zweep in Postert wo ouch jaorliks ane optoch deilgenomme waerdje. Later maakdje ouch Nathalie deil oet vanne “men onger os”. Inmiddels zeen Kristian en Nathalie al ongervieër ongerhalf keer èllef jaor lid van oos vastelaovesvereniging, eder jaor mit ein ongekindj hoeag aanwezigheidspercentage. Kristian is de drievendje krach achter ’t Zate Hermeniekes Festival en hiltj zich al jaore bezig mit inkoup en distributie van slok. Mer veural is hae ein fieësnummer en altied in om kloeaterie oet te haole en van nieks get te make. Nathalie is veurnamelijk oppe achtergrondj mit vanalles bezig. Nathalie noom mede ’t initiatief om dansmarietjes actief te kriege bie D’n Uul van den Grauwert en det is mieër es good geslaag! Nao al die jaore bie de vastelaovesvereniging geit noe de groeate wins in vervulling om es Prinsepaar veurop te gaon inne vastelaovendj.

 

In ’t dagelijks laeve is Kristian wèrkzaam es production engineer bie Vekoma Rides in Vloearop. Nao wèrktied is d’r regelmaotig oppe tractor te vinje om eige landj te bewèrke of om oet te helpe in ’t loeanwerk. Mit ’n stök of 4 eige kuuj zóts se bienao zigke det ’t eine hobbyboer is. Kristian is eine henjige jong en es se henjig bös, dan höbs se altied werk. Ofwaal veur dichzellef, of waal om emes anges te helpe. En det kump good oet, want stil zitte is neet zien dink, dus gein klus te gek om aan te pakke. Nathalie knip half Mofert en omstreke de haore in zien eige kapsalon aan hoes, Geweun Sjiek. Daonaeve hulp ’t nag aaf en toe oet, “thoes” op Vurehaof in Postert. In ziene vrieje tied geit ’t gaer nao ’t theater of kins se ‘m zeen loupe mit hondj James urges inne bós of veldj tusse Mofert en Postert. Same höbbe ze d’r veur gezorg det ouch häör kinjer ’t vastelaovesvirus te pakke höbbe gekrege. Tygo boedj inmiddels al zellef eine vastelaoveswage mit ‘ne groep vrunj. Sue is dansmarietje bie D’n Uul van den Grauwert en zingk alle Limburgse (en zeker Moferter) vastelaovesleedjes mit.

 

Prins Kristian I en Prinses Nathalie gaon neet allein veurop dit sezoen. Ze waere biegestange door häör 2 adjudante Johnny van Pol en Thijs Pouls, allebei men mit prinselijke ervaring dus det mót goodkomme. Same mit de res vanne vastelaovesverenging en zeker ouch alle luuj van Mofert gaon ze d’r ein onvergaetelijk vastelaovessezoen van make in ‘t 120e laevesjaor van D’n Uul van den Grauwert. Prins Kristian I en Prinses Nathalie regere ónger de kort mer zieër krachtige spreuk: “Groeat en gruuets!”

 

Foto: Thieu Smeets, Mofert